تغيير باسورد الواي فاي فى جميع انواع الراوتر

ازاي نغيير باسورد الواي فاي ؟ يُعد تغيير كلمة مرور شبكة الواي فاي مهمًا جداً لحماية شبكتك اللاسلكية من الاختراق . وتغيير كلمة مرور شبكة الواي فاي الافتراضية التي تأتي مع معظم أجهزة الراوتر وهو خطوة بسيطة يمكن اتباعها لتحسين الأمان الخاص بك.

تسجيل الدخول 192.168.1.1 :-

علشان نغيير باسورد صفحة الراوتر فـ اول حاجة هنعملها في كل انواع الرواتر هنعمل تسجيل الدخول على ip الراوتر 192.168.1.1 .

ممكن يظهرلك على ip صفحة الراوتر (Your connection is not private – الاتصال بهذا الموقع الالكتروني ليس خاصاً) ، فهندوس علي “Advanced – الإعدادات المتقدمة” .

وبعد كدا نختار (Proceed to 192.168.1.1 – متابعة إلي 192.168.1.1) . 

وهيفتح معانا بعد كدا صفحة الراوتر .

طريقة تغيير باسورد الواي فاي :-

اول راوتر معانا وهو موديل “HG630 V3” او راوتر “HG633” او راوتر “DG8045” وكلهم بيكونوا نفس السوفت وير زي بعض بالضبط مع اختلاف شكل الراوتر الخارجي فقط .

Prev 1 of 3 Next

بعد ما فتحنا صفحة الراوتر هتكون بالشكل دا ، وهيحتاج مننا نكتب اليوزر نيم والباسورد الخاصين بصفحة الراوتر وليس الخاصين بـ الواي فاي وديماً اليوزر نيم بيكون admin وكلها حروف صغيرة .

هنلاقي الاسم والباسورد في مكتوبين على ضهر الراوتر .

1. بعد ما دخلنا علي صفحة الراوتر علشان نغيير باسورد الواي فاي هنختار (Home Network) .
   
2. وبعدين نختار (WLAN Settings) .
   
3. ونيجي شوية نحية اليمين شوية و بعد كدا ندوس على (WLAN Encryption).

1. في خانة (SSID) اقدر من خلالها اغير اسم الواي فاي .
2. في خانة (WPA pre-shared key) من خلالها هقدر اغير باسورد الواي فاي .
3. في خانة (Hide broadcast) من خلالها اقدر اخفي اسم الواي فاي لو وضعت عليها علامة صح ، لو شلت علامة الصح فـ انا بظهر اسم الواي فاي .

كيفية تغير باسورد الواى فاى راوتر وي zxhn h108n v2.5 :-

ودا شكل راوتر zxhn h108n

بعد ما دخلنا علي ip صفحة الراوتر 192.168.1.1 هيطلب مننا ندخل اليوزر نيم والباسورد الخاصين بالدخول على صفحة الراوتر وديماً اليوزر نيم او الاسم بيكون admin حروف صغيرة كلها .
الاسم والباسورد هنلاقيهم مكتوبين على ضهر الراوتر ، وملحوظة مهمة جدا في راوتر zxhn h108n ، بيكون مكتوب على ضهر الراوتر باسورد الواي فاي فقط ، اما باسورد الدخول على صفحة الراوتر بيكون هو هو باسورد الواي فاي ولكن لو فيه اي حروف انجليزي بنعملها كابتل بدلاً من حروف صغيرة .

مثال علشان نفهم اكتر : انا عندي باسورد الواي فاي الافتراضي had13652 لما نيجي نخش علي صفحة الراوتر هنكتب نفس باسورد الواي فاي ولكن كابتل بالشكل دا HAD13652 .

وبعد ما دخلنا علي صفحة الراوتر علشان نغيير باسورد الواي فاى هنختار كلمة (Network) .

وبعدين هدوس على (WLAN) .

وبعدين هختار كلمة (Security) .

ومن خانة (WPA Passphrase) هنقدر نغيير باسورد الواي فاي وبعدين هنغير اسم الواي فاي من مكان تاني ولكن دلوقتي هندوس على (Submit) لحفظ التغيير ، وهتلاقي بعد كدا الواي فاي فصل معاك وسجل الباسورد الجديد في جهازك او موبايلك .

هندخل على صفحة الراوتر مرة تانية علشان نغيير اسم الواي فاي ، وهختار (Network) وبعدين كلمة (SSID Settings) .

في خانة (SSID Name) هنقدر نغيير اسم الواي فاي ، ولو حبيت تخفي الشبكة هنعلم صح على كلمة (Hide SSID) ، وبعدين ندوس على (Submit) لحفظ التعديلات ونسجل جديد على شبكة الواي فاي لإنه هيعمل تسجيل خروج معانا .

طريقة تغيير باسورد الواي فاي راوتر zxhn h168n :- 

ودا شكل راوتر ZXHN H168N ، وهو بيكون النسخة الاحدث من الراوتر السابق zxhn h108n

بعد ما دخلنا علي ip صفحة الراوتر 192.168.1.1 هيطلب مننا ندخل اليوزر نيم والباسورد الخاصين بالدخول على صفحة الراوتر وديماً اليوزر نيم او الاسم بيكون admin حروف صغيرة كلها .

الاسم والباسورد هنلاقيهم مكتوبين على ضهر صفحة الراوتر ، وناخد بالنا من الحروف الانجليزي لو مكتوبة سمول او كابتل تكتبها زي ما هي .

1. بعد ما دخلنا على صفحة الراوتر علشان نغيير اسم وباسورد الواى فاي هختار كلمة (Local Network) .
   
2. بعد كدا هدوس على (WLAN) .
   
3. وهاجى نحية اليمين وهختار (WLAN SSID Configuration) .
   

1. في خانة (SSID Name) من خلالها اقدر اغير اسم الواي فاي .
2. في خانة (SSID Hide) من خلالها اقدر اخفي شبكة الواي فاي مجرد معلم عليها صح هتختفي الشبكة .
3. فى خانة (WPA Passphrase) من خلالها اقدر اغير باسورد الواي فاي .
4. بعدين هدوس على (Apply) لحفظ التعديلات ، وشبكة الواي فاي هتخرج معانا ونرجع نعمل تسجيل دخول لباسورد الواي فاي الجديد .

كيفية تغير باسورد الواى فاى لراوتر TP-LINK TD-W8901N :-

شكل راوتر TP-LINK TD-W8901N

بعد ما دخلنا علي ip صفحة الراوتر 192.168.1.1 هيطلب مننا ندخل اليوزر نيم والباسورد الخاصين بالدخول على صفحة الراوتر وبتكون ديماً في رواتر Tp Link بيكون الاسم admin والباسورد بردوا بيكون admin وكلها بتكون حروف صغيرة .

علشان نبداء نغيير باسورد الواي فاي هنختار (Interface Setup) وبعدين ندوس على كلمة (Wireless) .

1. في خانة (Broadcast SSID) نقدر من خلالها نخفي شبكة الواي فاي نعلم على كلمة (YES) .
2. في خانة (SSID) نقدر من خلالها نغيير اسم الواي فاي .
3. في خانة (Pre-Shared Key) نقدر نغيير باسورد الواي فاي .

وبعدين ننزل لتحت وندوس على كلمة (Save) ، وبعد كدا هنلاقي الواي فاي عمل تسجيل خروج من الشبكة وندخل نكتب باسورد الواي فاي الجديد .

في النهاية كدا نكون شرحنا تغير باسورد الواى فاى we من الموبايل وكمان شرحنا موديلات لرواتر تانية واتمني يكون الشرح مبسط وسهل ولإي استفسار اكتبلي في التعليقات .